By in wynkrêft 5 út it westen begûn ‘it doarp Eastermar’ op ‘e Iselmar by Hylpen oan syn earste IFKS-wedstriid fan 2016. De stie in fikse deining en ûnder dizze omstannichheden moasten ús mannen en froulju oan ‘e bak. It waard in oantreklike silerij foar bemanning én publyk, mei in 7e plak yn ‘e einklassearring.

Yn de earste rûte kaam skipper Geale Tadema as 9e by de boppeste tonne. Foar de wyn rûn it skûtsje ‘as in trein’. By de ûnderwynse gate keazen de Eastermarders foar de bakboardtonne en gienen achter de ‘Striidber’ (Siebo Zijsling) en ‘Wylde Wytse’ (Sikke Heerschop) oan. Yn dat krúsrak waarden der trije skûtsjes ynhelle, sadat by de twadde rûning fan ‘e boppeste tonne in 6e posysje ynnaam waard.

Foar de wyn werom nei de ‘gate’. Yn dy loop helle ‘it doarp Eastermar’ de ‘Wylde Wytse’ yn en it rekke dat skip krekt mei de opstekker: strafrûntsje! Mei as gefolch dat fjouwer oare skûtsjes ús favoriten foarbyfearen. Dus de fjirde rûte yn as 12e. Dat úteinlik finisht waard op plak 7 mei in prestaasje fan formaat neamd wurde.

De fleurige konklúzje fan ien fan ‘e bemanningsleden wie dan ek dat ‘it doarp Eastermar’ troch yn ’t begjin trije plakken te winnen en nei it strafrûntsje nochris fiif yn te heljen, útroppen wurde mocht ta ‘meast striidlustich skip’.

foto's makke troch: Lucas Steunebrink (www.lucassteunebrink.nl)